依家星期六多數琉煮飯仔, 呢餐係煮得最多餸最豐富。清蒸桂花魚、蒜茸豆豉蒸帶子、炒粒粒+上湯娃娃菜。兩個人食唔哂, 真係飽到上心口!
清蒸桂花魚~我最愛魚類之一。淡水魚中嘅老鼠班(阿媽話嘅), 肉滑、少骨又唔會有泥味, 清蒸最好味! 嘴尖嘅曹先生都好鍾意佢架! 蒸魚係我必備菜色, 無他....因為懶, 買魚時魚販會幫你劏, 返去洗乾淨比d薑蔥蒸就ok, 慳功夫又有營養。
蒜茸豆豉蒸帶子~帶子蒸至大半熟, 豆豉蒜茸薑末落鑊爆香, 加入帶子&蒸出來的汁液兜勻, 汁收乾放番上帶子殼上。呢個係臨場加料, 見10蚊3隻, 買黎試下。都怕蒸出黎係擦字膠, 好彩...還可以
炒粒粒~雞腿肉+素雞+蘿蔔乾炒埋一碟, 最後加d花生兜兩兜就得! 呢碟野食左一半...第日用黎炒飯, ok 架!
最後懶人菜~~上湯娃娃菜, 比d雞湯煮腍菜, 打個玻璃芡搞掂! 娃娃菜唔洗摘, 切開洗幾洗就得, 又襟煮, 絕對不怕煮得耐左黃哂!
